കോഴിക്കോട്: ആദിവാസി യുവാവിനെ കോഴിക്കോട് മെഡിക്കൽ കോളേജ് ആശുപത്രി വളപ്പിലെ മരത്തിൽ തൂങ്ങിമരിച്ച നിലയിൽ കണ്ടെത്തി.
വയനാട് കൽപ്പറ്റ പാറവയൽ കോളനിയിൽ വിശ്വനാഥൻ (46) ആണ് മരിച്ചത്. ആശുപത്രി ജീവനക്കാർ മോഷണക്കുറ്റം ആരോപിച്ചതിനാൽ വിശ്വനാഥൻ തൂങ്ങിമരിക്കുകയായിരുന്നുവെന്ന് ബന്ധുക്കൾ പറഞ്ഞു.
പ്രസവത്തിനായി പ്രവേശിപ്പിച്ച ഭാര്യ ബിന്ദുവിനൊപ്പം കഴിയാനാണ് വിശ്വനാഥൻ ആശുപത്രിയിൽ എത്തിയിരുന്നത്.
ആശുപത്രിയിൽ നിന്ന് പണവും മൊബൈൽ ഫോണും മോഷ്ടിച്ചെന്ന് ആരോപിച്ച് ആശുപത്രി ജീവനക്കാർ വിശ്വാനാഥനെ ശാരീരികമായി ഉപദ്രവിച്ചതായി ഭാര്യാമാതാവ് ലീല ആരോപിച്ചു.
താൻ തെറ്റൊന്നും ചെയ്തിട്ടില്ലെന്ന് അപേക്ഷിച്ചിട്ടും അവർ വിശ്വനാഥനെ പീഡിപ്പിക്കുകയായിരുന്നു എന്ന് ലീല പറഞ്ഞു.
മോഷണക്കുറ്റം ആരോപിക്കപ്പെട്ടത് വിശ്വനാഥനെ അസ്വസ്ഥനാക്കി, സംഭവം നടന്നയുടനെ അദ്ദേഹത്തെ കാണാതാവുകയും പിന്നീട് മരിച്ച നിലയിൽ കണ്ടെത്തുകയും ചെയ്തു.
മരണത്തിൽ അന്വേഷണം വേണമെന്ന് കുടുംബം ആവശ്യപ്പെട്ടു.
